TURNFAHRT  FRAUENRIEGE 3./4. SEPTEMBER 2005

Dä Himmel isch no mit Wolke verhange gsi, wo sich 16 guetgluunti Fraue troffe händ zur Turnfahrt. D`Leitig für das Wocheend händ Klara und d`Yvonne übernoh, viele Dank üsne zwei Reiseleiterinne. Mit em Poschti sind mer uf Brunnodere gfahre, womer doch sage und schreibe scho dä erschti Kafihalt gha händ im Bahnhöfli! Es paar Fraue händ scho bald nüme möge g`warte das Tal z`verloh, um nurno under üs Mensche z`sii! So sind mer denn in Zug Richtig Uznach g`stige, wo üs d`Sonja en feine z`Nüni mit Kiwischämpis offeriert hätt. Viele Dank. Eini vo däne Fläsche isch no übrig blibe, hend äbe doch nöd ali so Durscht gha! Dä nöchscht Apero isch au scho organisiert, ennet em Bahngleis vo Uznach hät dä Klara sin Schwoger mit feinem Wiiswy und wa no so dezue ghört verwöhnt. Au do en herzliche Dank. So richtig guet gstärkt sind mer denn go luege, wa für en nette Poschtautochauffeur üs uf Ziegelbrugg fahrt. Das mol ischs Glück uf üsere Siite gsi, dä hett üs doch glatt bis uf Bruuwald gfahre, doch die andere Fahrgäscht sind denn doch nöd Iiverstande gsi mit däre Route.

Sind ächt au ali in Zug uf Glarus iigstiege? Per SMS isch gsuecht worde und do isch äbe us cho: Wir tahren 1. Klassi, Gruess Tara!!! Die viele Apero`s vom Morge hend scho sini Wirkig zeigt, drum sind in Glarus au scho bald ali WC b`setzt gsi. Schliesslich hetts golte, dä Rucksack d`schultere und während em Marsch dörs Industriequartier und Stude isch plötzlich d`Froog uuftaucht, öb das dä richtig Weg seg? Womer denn aber s`Restaurant Horgerberg erblickt händ, isch üs wöhler gsi und mer händ i dä lauschige Gartewirtschaft en feine z`Mittag gnosse. Niemert hät en Schluck Zielwasser zu sich gno, debii wär das Nötig gsi um bim aaschlüssende Minigolf die viele Löcher z`treffe. Einigi händ trotzdem persönlichi Erfolgserlebnis gha, während anderi dä chli wyss Ball im Gebüsch händ müese go sueche! Nochdem au dä letscht Ball verlochet gsi isch sind mer wiitermarschiert zum nöchschte Bahnhof. Underwegs bimene verlockende Brune isch üsi Irma churzerhand no schnell umtauft worde , si isch fortan dä Lödi gsi. In Mitlödi häts kei Bahnpersonal und drum muesmer dä gross rot Chnopf drucke, wenn dä Zug sötti aahalte. Kathrin hett sich sofort uf d`Suechi noch dem Objekt gmacht, nochdem d`Reiseleiteri Yvonne uusdrücklich uf da higwiese hett! Mitem Bahntelefon isch au no probiert worde, öpper uusfindig z`mache, denn dä Zug hett scho söle do sii. Dä isch denn doch no iigfahre und nochere churze Fahrt sind mer in Linthal umgstiege id Bruuwaldbahn. Guet hend mer do nöd müese laufe, isch doch scho chli fescht obsi gange. Im Dörfli aacho, händ mer en wackere Adrenalinschub gha, wo mer üsi Unterkunft gseh händ! Die Teppich a dä Wänd sind zwor chli altmodisch gsi, aber ä güebts Huusfraue-Aug hett  schnell gseh, dass alles suber und zweckmässig isch. Noch em Grangel, wer mit wem dörf oder mues, (weg dä Gschmäckli i dä Nacht), im gliiche Zimmer schlofe hend mer üs uf dä Weg gmacht zum Gondeli, wo üs id Höchi gfahre hett. Dett ine sind mer gad ine worde, das d`Yvonne d`Muetter isch vomene frischbachne Kantonalmeischter und da hett natürlich sofort müese gfiiret werde. Noch dem Kurveöl sind mer denn muetig gnueg gsi um es Trottinett z`fasse. Uf dem holprige Strössli sind mer nöd wiit cho, scho hend mer müese aahalte. Isch üs eine entgege cho und nocheme churze Schwätz hend ali gwüsst, das dä Buur jung, hübsch und erscht no ledig isch… D`Fahrt isch wiitergange, wobii no dä Säuli-Express vo Bruuwald dä Weg verspeert hät. Nocheme waghalsige Ueberholmanöver  hend mer freie Fahrt gha und so simmer im rasante Tempo im Dorf iigfahre. Au Theres und d`Annemarie sind ohni Sturz aachoo. Und denn isch zagg-zagg gange. Die erschte sind scho duschet und parat vorem Hotel parat gsi, während die schnelle Flitzer sich mitere Chatzewösch hend müese zfriede gäh. Für dä z`Nacht hend mer zersch müese dä Uhu go sueche, womer mit feine Spaghetti üsen Buuch überfüllt hend, obwohl da luschtig Wienerli mit Chnopf au ganz verlockend gsi wär. Isch ächt dä Wy d`schuld gsi oder wiso händ ali ufzmol so schwäri Bei gha? Do wärs doch nöd schlecht, mer chönnt jetz mit dä Rössli… äh, Autokutsche is Dorf abe Fahre, so hetts uf jede Fall Kathrin gmeint. Es isch denn weder es Ross no es Auto vorgfahre und so sind mer denn halt glich is Dorf abe glaufe, bevor mer üs is Nachtläbe vo Bruuwald gstürzt händ…………

Die einte sind echli früener go s`Chopfchössi sueche, während die andere echli spöter die früene wieder gweckt händ. So hetts bi dä Sonja die ganz Nacht s`Liecht brennt, während d`Annemarie en ganze Wald versäget hett . Eis Bett isch denn doch leer blibe, d`Heidi hät  d`Matratze packt und eres Nachtlager churzerhand uf dä Balkon verleiht.

Punkt em halbi isch am achti  denn Tagwach für alli gsi, me mue jo nöd fröge, wer dä Wecker gsi isch! Die früene vo letscht Nacht hend scho es Morgespaziergängli gmacht, während die spoote müehsam us dä Federe kroche sind. So hend denn au nöd ali dä gliich Appetitt gha, obwohl da z`Morgebuffett sehr verlockend gsi isch.

Am Sonntig hetts golte, dä Yvonne z`folge und so hät sie d`Abmarschzyte bekannt gäh. „ Wa meinet denn er, sölet mer am nüni go oder am viertelund oder doch erscht am halbizehni“? Me hett sich denn uf die viertelund geiniget und so hend ali dä ach so schwer Ruchsack g`schulteret!!! Wie isch ächt da möglich, das dä Rita sis Gepäck ihre viel schwerer vorchunnt als am Samstig? Niemert hett öppis wöle wösse und drum isch da erscht viel spöter am Schluss vo üsere Wanderig uuschoo…

Nocheme Stündige Marsch dör es herrlichs Gebiet, wo mer au no hend chöne ame Steibockschüsse mit Pfiil und Boge zueluege, sind mer im Restaurant Nussbühl hungrig und durschtig aachoo. Während die einte dä Zmorge noogholt händ, sind anderi scho voruus und händ dä steili Uufstieg uf sich gno. Das mer i üsem Alter scho vergesslich cha sii sölls jo gäh, aber gad däreweg!!! Yvonne, do muesch öppis dägege undernäh!!!  Immer meh isch da ufwärts gange, au no verbii a gföhrliche Uebergäng und da hät au no die tapfer Ruth im 8. Monat müese uf sich näh. Aber so ganz noch Stüdli-Art ( gooht scho ), hett sie da gmeischteret. Churz vor dä Mittagsrast hät d`Sonja däre mit em schwerschte Rucksack müese Notfallchügeli verabreiche, so schwach isch die gsi vom viele träge! Ob sich ächt do schlecht Gwüsse gmolde hät? Au die letschte hend sich denn chöne uusruebe bimene Picknik mit Blick uf dä Urnerbode, üsers Wanderziel. Wiso nur hend do anderi Wanderer kehrt gmacht? So wüeschti BH`s hend mer jetzt au nöd aagha! Bi schönschtem Suneschii hend mer chöne verwiile, dehei sinds im Nebel ghocket, da hend einigi Fraue vo erne Mane erfahre. Natel sei Dank!

Wo ali wieder munter gsi sind, isch wiiter gange, damol graduus und abwärts. Bi dä nöchschte Alp hend mer  Bekanntschaft gmacht und so sind mer denn halt plötzlich 18 gsi !

Chum Gitz, Gitz , hett d`Heidi gruefe und d`Irma isch derwiil so schnell glaufe, a Olympia hett sie sicher ä Medaille gwune. Die 2 Geissböck hend sich denn als sehr aahänglich  zeiget, uf jede Fall häts däne gfale bi üs. Immer witter sinds mit üs trottet und so sind mer bi dä nöchschte Alp aacho. Vo usse hett jo da WC no ganz guet uusgseh, aber vo ine??? Da isch halt so doo, hett sich d`Heidi denkt und dä Drang isch grösser gsi als d`Eitelkeit.   Dusse hett d `Yvonne sglich Bedürfnis gha und nochdem sie sich überwunde hätt, dett ie z`goh, sind vo usse gellendi Schrei z`ghöre gsi! Wa isch denn bloss do ine los? I bi doch gad au no uf dem WC gsi? D`Heidi hilft dä Yvonne, die Tür uufzmache, aber die verloht fluchtartig da Hüüsli, nödemol aagleit isch si fertig! Debii hetts doch ganz komfortabels, drüülagigs Hakle WC-Papier gha? Da hend sich die beide jo au denkt, die erscht häts nödemol gmerkt, während die ander s`Graue packt hät. Us dem Papier sind nämlich Made!!!, Bschöttichäfer kroche, igitt, wääh, pfui Teufel! Wa für üs im nochhinein zum lache gsi isch, verfolgt die arm Yvonne no mengi Nächt!!!

Noch dem gruuslige Zwöschefall isch üsi Leiteri so desorientiert gsi, das dä Weg zum Urnerbode selber hät müese uusfindig gmacht werde. So noch guetdünke sind mer wiiterzoge, immer no i Begleitig vo mittlerwiile 2 läschtige Geissböck. Immer uf dä Huet, das au jo ali Hääg wieder zue gmacht werdet, sind mer über d`Alpe gstolperet. Das do au no ä Chueherde zu üs stosst, hett gad no gfählt! Die sind nämlich gär nöd guet z`spreche gsi uf üsi beide Begleiter, wo mittlerwile ali öberholt hend und scho bi dä Astrid und dä Sonja vorne aachoo sind. Im gstreckte Gallopp sind die Chüe uf die Geissböck los. S`tummi dra isch no gsi, das die 2 wiederum dä Sonja hineno sind. Da isch jo ä Buuretöchter, die wird scho wösse, wa do ztue isch, hett sich d`Astrid gseit. Umzinglet vo wild gwordne Chüe und 2 überstellige Geissböck isch vorsichtshalber scho mol dä Rucksack zur Waffe worde. Die Turbulenze händ sich denn beruhigt gha, womer a dä Stross une aachoo sind. Aber die 2 Geissböck sind hartnäckig mit üs wiiterglaufe! So isch üs nüt anders übrigblibe, als die beide ime private Grundstück iiz`speere, au wenn Besitzer nöd so begeischteret gsi sind vo däre Idee. Nüt desto trotz, mer sinds endlich los gsi, söss wäret die no mit is Poschtauto gstiege! Do druf hett nochli müese gwartet werde, drum isch Zyt gnutzt worde, am nöche Fluss die strapazierte Füess abzchüele. Aah, isch das ä Wohltat gsi, use us dä Wanderschue und denn Badelatsche aazieh. Doch da isch nöd s`einzig gsi, wa d`Rita uuspackt hät. Isch doch wörklich no die vorig Fläsche Kiwischämpis vom Samstig zum vorschii cho! Da Gwicht isch  doch kei Iibildig gsi, er liebe Fraue! Guet isch dä Fluss so chalt gsi, da Tröpfli isch schnell abeküelt und trunke worde. Danke, isch fein gsi!!!

Zämepacke, witter gohts! No schnell echli Chäs chaufe und ufs Poschti warte. Da isch denn au cho, nur völlig überfüllt. Gstossevole, und mer hettet au no söle ie! Nochere churze Reklamation isch üs nüt anders übrig blibe, als üs wie Sardine zwöschet die andere Fahrgäscht z`quetsche. So isch es au kei Wunder gsi, das d`Ruth no eim d`Hose verdräcket hät! Dä Chauffeur hät sis beschti gäh und ali Sehenswürdigkeite genauschtens dokumentiert. Alles, womer gseh händ, sind die steile Wänd gsi am Strosserand! So sind mer denn halt Uusichtslos im Tal aacho, wo scho dä Zug gwartet hät. Während dä Fahrt isch doch d`Müedigkeit uufcho, so isch ziemlich ruhig gsi i üsem Abteil, was jo eigentlich nöd so normal isch! Nomol häts gheisse, is Poschtauto umstiege, bevor mer no dä letschti Abschnitt vo üsere wunderschöne Turnfahrt in Aagriff gno händ. Vo Uznach isch es nüme wit hei, drum hät au schnell müese dä Chäs gesse werde, wo underwegs poschtet worde isch. Dä fehlend Zmorge hät sich erscht jetzt bemerkbar gmacht! Z`Wattwil a dä neue Chalberhale vorbii, hend scho ali wöle dä Subaru gwone ha, no durs Tunnel und scho isch Endstation gsi. No mit em Poschti deruuf und denn schnell ab in Sonnehof, wo mer mit äme z`Nacht üsi Turnfahrt uusklinge loo händ.

En grosse Dank a dä Klara und dä Yvonne, sie händ ä Super Turnfahrt organisiert. Es hät viel z`Lache und z`Erlebe gäh und so chönd ali Beteiligte miteme guete Gfühl uf Turnfahrt 2005 zruckblicke.

Rita und Sonja

last update: 08.01.2012
mail to Webmaster