„Was ziehet so munter das Tal entlang“........... d’Fraueriege uf de Turnfahrt natürli!

 Am morgä am Nüni besammlet sich 13 Reiseluschtigi Fraue bi dä Poscht z’OH und im „Wigi“ dä Rescht.Mit Poschtauto und Zug gohts den richtig Schänis. Verfolgt vomene feine Duft (Schinkegipfeli) händ mer üs im Zug en „Plauder-Wii“zom abäschpüele gnehmiget – en herzliche dank dem Ross!Z’Schänis händ mer üsi Drohtessel gsattlet und üs uf de Weg richtig Walestadt gmacht.Trotz chlinere „zwöschet dä Fäll“ und „Ahält“,gell Annemarie,Irma und Manuela (mer cha jo s’Velo au lupfe zum umchere),sind mer guet acho z’Walestadt. Noch dem mer d’Rädli abgeh händ isch es mit glächter und gsang wieter noch Jenins gange. Dä Zugbegleiter hett üs am liebschte bhalte und nochli mitgsunge, aber .....alles hatt ein Ende, nur die Wurst hatt zwei......!!!

Mitere Interessante Füehrig dur dä Rebberg und Betrieb Obrecht-Weine händ es paar gmüetlichi Stunde eren Afang gno. Mit eme feine Zvieri und öppä eim Glas Wii...........sind mehr verwöhnt worde.Viel zfrüeh scho händ mer wieder müesse wieter und d’ Erika vo erne Sorge um de gnadelos hüpfendi Uhrzeiger befreie. Mehreri Poschtauto mit super Chauffeure händ üs uf de St.Margrether Berg brocht.Nocherä abchüelende Duschi und eme improvisierte Spalierstoh mit Küsse sind mehr im Hochziitsbus richtig Nachtesse zue gfahre.E feini Bündner Polenta usw. hätt fascht alli wieder munter gmacht und mehr händ ab sofort s’Nachtläbä agfange gnüsse.

Dä Hugo und Gaierwalli händ üs den no bis in Traum verfolgt.

Am Morgä ca. am Halbi isch den Tagwach gsi und alli üsi Morgemuffel sind zom Nescht us gjagt worde. Söll niemmer fröge vo wem!???! Will au de Wirt bis i all Nacht pläuschlet hett und promt verschlofe hätt, händ mer müesse zom Fenschter i und de Zmorgä selber parat mache. Gschtärkt händ mer den bi strahlendem Sonneschii üsä 1stündig Marsch noch Pfäffers unter d’Füess gno. Unterwägs bim „Chüe-usloh“ isch es den no zonere Samariterüebig cho, well jo d’Rucksäck hütt so luschtigi „Armträgerli“händ. Z’Pfäffers händ mer den leider nöd s’falsche Poschtauto, aber dä falsch Poschtautochauffeur verwütscht!!!!!(Besser ohne Worte)

Vo Bad Ragaz isch es mit em Zug und luschtige Liedli richtig Walestadt gange, wo mer prompt vonere ganze Muusiggsellschaft empfange worde sind. Die händ üs den spöter no bis uf Weese begleitet und uf em Schiff immer wieder mit Musig unterhalte.Nochere feine Glace oder eme churze „gschnatter-schlöfli“ händ mer üs stehend uf de Heiweg gmacht.Im Restaurant Rössli z’Dietfurt hätts zum Abschluss no en feine z’Nacht geh.

En riesige Dank för die super lässig Turnfahrt a üsi Organisatorinne und .....gäll mer händ schö gfolget?.....

 „eine Schar im weissen Gewand“............jetzt chönd au mer alli drü Strophe vom Turnerlied!!!!

zu den Bildern

last update: 08.01.2012
mail to Webmaster