 |
||
 |
Jugi-Reise 2003 |
|
| ||||||
|
Jugireis
vom 20. September 2003 Bi schönstem Wetter händ sich am Samstigmorge am nüni 55 Chind und 8
Jugileiterinne und Jugileiter vor em Volg z’Oberhelfenschwil troffe. Mer hät
dänn no zerst möse s’ Geld zahle und alli händ s’Protmonne gleert. Üsi
Chefin d’ Manu hät nochher en ganz fette Geldbütel gha. Mit guete Schue und
vollpacktem Rucksack hät me d’Chind i zwei Bus inegstopft. Es hät es
richtigs Gmoscht ge. Mit emene Maitli- und Buebebus isch d’ Fahrt noch Atzmännig
losgange. A de Talstation het scho Brigitte uf üs gwartet. Denn isch mer immer
s’zweite uf es Bähnli ghocket. Di Chlinste vo üs händ dänn e Leiterin oder
en Leiter übercho, wo äs paar gad als „Mami“ für de ganzi Tag gmietet händ.
Dobe acho isch d’Wanderig losgange, für
mengi Chind ä strengi und für anderi ä eifachi Tour. Zwüschedure händ
mer äs paar chlini Päuseli brucht, zum Trinke und üs wieder voll tanke. Anere schöne Füürstell hämer denn üsi Mittagspause gmacht. Aber es
paar Spezialiste sind scho vorus und me häts denn wieder müese zrugg rüefe.
Bis d’Wurst döra gsi isch, sind die Grössere ab uf d’Bäum, die andere händs
sich suscht verwilt. Noch üsere Mittagspause hämer üs uf de Weg Richtig Chrüzegg
gmacht. Noch ere halbe Stund sind mer döt au scho acho. I de Chrüzegg häts für
alli ä feini Glace ge. De Spenderin Sonja Böni, Rest. Rössli än herzliche
Dank!! Wo endlich emol alli uf em WC gsi sind, hämer no s’obligatorische
Fotoshooting müese mache. Vo do isch denn d’Wanderig nuno abwärts gange. Wieder a de Talstation
sind mer denn alli zäme cho, do händ mer denn au die Schnellste wieder emol
troffe. D’ Jugichefin isch denn Billett fürs Rodle go chaufe. Aber nöd alli
Chind händ wölle go. Die händ sich denn uf em Spielplatz verwilt. Für die
andere isch s’Bändli wieder noch ufe pendlet. Aber dasmol nüme bis ganz ue.
Denn sind mer noch em Aastoh i denen chline Wägeli wieder s’Loch ab düset.
Mit em Billett hät mer denn no eimol uf de Rutschturm törfe. Noch üsem
Rutsche händ mer üs vo dene verabschiedet, wo nüme mit em Bus heicho sind. D’Fahrt noch Oberhelfenschwil isch sehr ruhig und heiss gsi, denn me
sind alli chli müed gsi. Mit echli Verspötig sind mer denn alli wieder gsund
und heil z’Oberhelfenschwil acho. Äs isch en mega lässige Tag gsi, wo allne
sicher i gueter Erinnerig wird bliibe. I möcht allne Leiterinne und Leiter för
de schö Tag herzlich danke. Daniela Jud |
|
|
